„ასოცირების შეთანხმების“ თანახმად ქართული კანონმდებლობა ევროკავშირის კანონმდებლობასთან უნდა დაახლოვდეს. ჰარმონიზების მოთხოვნა წყლის რესურსების მართვის სისტემაზეც ვრცელდება. ასოცირების დღის წესრიგის მიხედვით, საქართველოს აქვს ვალდებულება, რომ წყლის ეროვნული კანონმდებლობა დააახლოვოს ევროკავშირის წყლის ჩარჩო დირექტივასთან, რომელიც ევროკავშირში წყლების ხარისხობრივი და რაოდენობრივი დაცვის პირობებს ადგენს. „ასოცირების შეთანხმების“ ვალდებულებების შესასრულებლად საქართველოში შეიქმნა წყლის რესურსების მართვის კანონპროექტი, რომელმაც მიმდინარე კანონი უნდა ჩაანაცვლოს. კანონმდებლობის ჰარმონიზების შედეგად დაგეგმილია საქართველოს მასშტაბით წყლის მართვის სააუზო პრინციპის დანერგვა, რამაც წყლის რესურსების არარაციონალური გამოყენების პრაქტიკა და წყლის დაბინძურების ხარისხი უნდა შეამციროს.
