სწრაფად მზარდი ელექტრონული კომერციის სექტორის ფონზე გამოიკვეთა სფეროს რეგულირების საჭიროება. ამას გარდა, „ასოცირების შეთანხმება“ განსაზღვრავს ქვეყანაში ელექტრონული კომერციის პროცედურების ძირითად პირობებს და ავალდებულებს საქართველოს კონკრეტული ცვლილებების დანერგვას სხვადასხვა მიმართულებით, მათ შორის შუამავალი მომსახურების პროვაიდერებისა და მომხმარებელთა უფლებების კუთხით. ამის საპასუხოდ იგეგმება ელექტრონული კომერციის რეფორმა, რომელიც მიზნად ისახავს საქართველოში ელექტრონული კომერციის ხელშეწყობას სათანადო სამართლებრივი და მარეგულირებელი ჩარჩოსა და საჭირო ტექნიკური ინფრასტრუქტურის განვითარების გზით. ელექტრონული კომერციის რეფორმა მრავალი სხვადასხვა ასპექტისაგან შედგება და აერთიანებს დამნერგავი სამთავრობო უწყებების, საჯარო სექტორის დაინტერესებული მხარეების და კერძო სექტორის აქტივობებს.
