მსს პოლიტიკის ინდექსი: აღმოსავლეთ პარტნიორობის ქვეყნები

მსს პოლიტიკის ინდექსი ეკონომიკური თანამშრომლობისა და განვითარების ორგანიზაციის მიერ შეიქმნა და ზომავს აღმოსავლეთ პარტნიორობის ქვეყნებში მსს პოლიტიკის შემუშავებისა და იმპლემენტაციის ხარისხს, ასევე მსს პოლიტიკის შესაბამისობას ევროკავშირისა და საერთაშორისო დონის საუკეთესო პრაქტიკებთან. მსს პოლიტიკის ინდექსი მცირე და საშუალო ბიზნესის განვითარებაზე დასაკვირვებლად რეპუტაციული ინსტრუმენტია. წინამდებარე ანგარიშში წარმოდგენილია მსს პოლიტიკის ინდექსის 2020 წლის შედეგები საქართველოსთვის.

მსს პოლიტიკის ინდექსის 2016 წლის შედეგებთან მიმართებით, 2020 წლისთვის საქართველომ გააუმჯობესა მდგომარეობა მსს პოლიტიკის ინდექსის ყველა მდგენელში. გარდა ამისა, ქვეყანა ინდექსის ყოველი მიმართულებისთვის წინ უსწრებს აღმოსავლეთ პარტნიორობის წევრი ქვეყნების საშუალო მაჩვენებელს. 5 შესაძლო ქულიდან საქართველოს ყველაზე დაბალი შეფასება გაკოტრებისა და მეორე შანსის, ასევე მწვანე ეკონომიკის მიმართულებებში აქვს - შესაბამისად, 3.03 და 3.05 ქულები. ყველაზე მაღალი შეფასება საქართველომ შემდეგ კომპონენტებში მიიღო: ნორმები და სტანდარტები (4.56), ბიზნესის განვითარების სამსახურები (4.39), სამეწარმეო პირობები (4.36).

წინსვლისათვის, და იმისათვის, რომ ქვეყანამ მაქსიმალური სარგებელი მიიღოს ევროკავშირთან გაფორმებული ღრმა და ყოვლისმომცველი თავისუფალი სავაჭრო სივრცის შესახებ შეთანხმებიდან, მსს პოლიტიკის ინდექსის ავტორები მიიჩნევენ, რომ მნიშვნელოვანია საქართველოში ხელი შეეწყოს ყველა ზომის საწარმოსთვის თანაბარი თამაშის პირობების ჩამოყალიბებას, ასევე კონკურენციის შესახებ კანონისა და კონტრაქტების უკეთეს აღსრულებას. გარდა ამისა, ანგარიშში აღნიშნულია, რომ მნიშვნელოვანია გაძლიერდეს ექსპორტზე ორიენტირებული მსს მხარდაჭერის სქემები, ხარისხიანი პირდაპირი უცხოური ინვესტიციების მოზიდვასთან ერთად, რაც გააძლიერებს ქვეყნის ფარგლებში მსს ეკოსისტემას.

დოკუმენტის გადმოწერა: